Mumtoz maqom ashulalarini maromiga yetkazib, ixlosmandlar olqishiga sazovor bo‘lgan bu yosh xonanda Salomat Javdat qizi. Atlas ko‘ylaklarda yal-yal yonib, andijoncha raqsga tushayotgan qizlar O‘zbekiston Turk milliy madaniy markazi qoshidagi ansamblning raqqosalari. Yurtimizda o‘tkaziluvchi turli bayram va tadbirlar doirasidagi konsertlarda faol ishtirok etuvchi bu yosh ijrochilar san’at muxlislariga yaxshigina tanilib ulgurgan.
Mamlakatimizda tinchlik va osoyishtalikni ko‘z qorachig‘idek asrash, ijtimoiy barqarorlikni ta’minlash, turli millat va elat vakillarining o‘zaro ahil, hamjihat, bir oila farzandlaridek yashab mehnat qilishi uchun zarur sharoit va imkoniyatlarni yaratish davlat siyosatining ustuvor yo‘nalishlaridan biri sanaladi.
Bu borada olib borilayotgan uzoqni ko‘zlovchi va odilona sa’y-harakatlar yurtimizdagi ko‘plab milliy madaniy markazlarning samarali faoliyat ko‘rsatishi, tabarruk O‘zbekistonimizni o‘z ona-Vatani deb biluvchi ko‘plab millat vakillarining madaniyati, an’ana va qadriyatlari, urf-odatlarini saqlash, ularni yanada rivojlantirish, mazmun-mohiyatini targ‘ib etish imkonini bermoqda. Ayni jihatlar yurtimizda muvaffaqiyatli faoliyat ko‘rsatib kelayotgan O‘zbekiston Turk milliy madaniy markazi faoliyatida ham yaqqol namoyon bo‘lmoqda.
Mazkur markaz rahbari, mohir shifokor-tadbirkor, «Do‘stlik» ordeni sohibi Umar Salmonovning aytishicha, jonajon O‘zbekistonimizning istiqlolga yuz tutishi ko‘plab millat va elat vakillarining o‘z madaniyati va an’analarini rivojlantirishi uchun yangi istiqbollarni ochib berdi. 1991 yilda dastlab Buxoroda, 1992 yilda esa Toshkent shahrida Turk milliy madaniy markazlari tashkil etilib, samarali faoliyat ko‘rsata boshladi. 1997 yilning 26 martida tashkil etilgan O‘zbekiston Turk milliy madaniyat markazi esa endilikda Buxoro, Samarqand viloyatlaridagi milliy madaniy markazlari faoliyatini birlashtirib, muvofiqlashtirib bormoqda.
O‘zbekiston Turk milliy madaniy markazi o‘z ishi davomida mazkur millatning tili, madaniyati, qadimiy urf-odatlari, o‘ziga xos an’analarini qayta tiklash va yanada ravnaq toptirishga e’tibor qaratmoqda. Markazda faoliyat ko‘rsatayotgan yoshlar, xotin-qizlar bilan ishlash, sport, madaniy-ma’rifiy bo‘limlar, nuroniylar kengashi o‘z safiga yuz nafardan ortiq turli soha vakillarini birlashtirib, samarali ishlab kelmoqda. Ular safida o‘zining halol mehnati bilan elda obro‘ orttirgan olimlar, kashfiyotchilar, o‘qituvchilar, shifokorlar, mirishkorlar, muhandis va quruvchilar, san’at va madaniyat namoyandalari, sportsevar, san’atsevar iqtidorli yoshlarning borligi e’tiborga molik.
Markaz qoshidagi «Sevinch», «Anadolu», «Istambul» ansambllari hamda qizlar badiiy raqs jamoasi qadimiy musiqiy an’analarimiz, o‘ziga xos maktab va yo‘nalishlarini targ‘ib etishda faol hissa qo‘shib kelmoqda. Ushbu jamoalar «O‘zbekiston – umumiy uyimiz», «Qudratimiz – birlik va hamjihatlikda», «Vatan yagonadir, Vatan bittadir» kabi ijodiy tanlovlar, do‘stlik festivallarida muvaffaqiyatli ishtirok etib, nainki sovrinli o‘rinlarga, balki san’at ixlosmandlarining mehri va olqishi, hurmatiga sazovor bo‘lib kelmoqda. Shuningdek, «Fidoying bo‘lgaymiz seni, O‘zbekiston!» shiori ostidagi Vatanni, istiqlolni, tinch va osuda hayotimizni, saodatli kunlarimizni ulug‘lovchi konsertlar, xalq sayllari, musiqa kechalarida yuqorida nomi keltirilgan ijodiy jamoalar faol ishtirok etmoqda.
– Jonajon O‘zbekistonimizda yashab, istiqomat etayotgan turli millat vakillari kabi biz ham o‘z taqdirimiz, baxtimiz, istiqbolimizni shu mo‘tabar diyor bilan uzviy bog‘laganmiz, – deydi Ilyos Gulaydin o‘g‘li. – Shu aziz yurtda katta bo‘ldik, voyaga yetdik. Oqu qorani tanidik. Bilimli, kasb-hunarli bo‘ldik. Yaratilgan ulkan sharoitlar samarasida o‘z iste’dodimiz va qobiliyatimiz, salohiyatimizni to‘laqonli namoyon etish imkoniga ega bo‘ldik.
1999 yilda Mikoyil Afras o‘g‘li rahbarligida tashkil etilgan «MIKO» komediya teatri tomoshabinlarga yengil hazil va kulgu, ularga xush kayfiyat ulashish maqsadida bir qator spektakllarni sahnalashtirib kelmoqda. Bu havaskor ijodiy jamoaning spektakllari AQSh, Turkiya, Rossiya, Ozarbayjon, Qozog‘iston, Qirg‘iziston kabi davlatlarda ham iliq kutib olingani e’tiborga molikdir.
– Ijodiy jamoamiz tomonidan sahnalashtirilayotgan asarlarda odamlar o‘rtasida o‘zaro ahillik, totuvlik, do‘stlik rishtalarini mustahkamlash, kattalarga hurmat, mehnatsevarlik, halollik, fidoyilik, mardlik, bag‘rikenglik va olijanoblikni targ‘ib etish ustuvor o‘rin egallaydi, – deydi M.Afras o‘g‘li. – Zero, ayni tushunchalar nainki biz, o‘zbekistonliklarda, balki butun bashariyat tomonidan ham eng oliy qadriyatlardan sanaladi.
Turk markazi rahbari va boshqaruv a’zolari tomonidan ta’sis etilgan «I.M. DOST-FILMS» studiyasi tomonidan yaratilgan o‘nlab kartinalar yurtimiz tomoshabinlariga yaxshi ma’lum. «Shirin buloq», «Burch», «Chin muhabbat» (turk tilida surtga olingan) «Ota», «Qizg‘aldoq», «Begona bahor» kabi badiiy filmlar, «Jiyda guli» 21 seriyali teleseriali, «Oppoq orzular» singari serial-kartinalar mehr, muhabbat, sadoqat, oliyjanoblik, o‘zgalarga xayrixoh va ko‘makdosh bo‘lish kabi chin insoniy g‘oyalarni tarannum etgani, yoshlarni vatanparvarlik ruhida tarbiyalashdek maqsadlarni ko‘zlagani bilan ahamiyatlidir.
O‘zbekiston Turk milliy madaniy markazi tomonidan barchamizning eng ulug‘ va eng aziz bayramlar – Mustqillik, Navro‘z, shuningdek, Ramazon hayti, Qurbon hayiti bayramlari ko‘tarinki ruhda nishonlanadi.
– Prezidentimizning 2017 yilning yanvar oyida yurtimiz milliy madaniy markazlarining vakillari bilan uchrashuvi, yurtimizda millatlar va diniy konfessiyalar o‘rtasidagi o‘zaro totuvlik va hamjihatlikni ta’minlash borasida amaliy sa’y-harakatlari bizga katta kuch, ilhom bag‘ishlamoqda, – deydi U.Salmonov. – Poytaxtimizning eng so‘lim va tarovatli maskanidagi bino O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi hamda milliy madaniy markazlar tasarrufiga berildi. Binoning yonidagi so‘lim bog‘ «Do‘stlik bog‘i»ga aylantirildi. Har yili turli millat vakillari ham Vatanimizning eng oliy mukofotlari, orden va medallari bilan taqdirlanayapti. Davlatimiz rahbarining odamlar og‘irini yengil yetish, xalqning ko‘ngliga yo‘l topish, turmush farovonligini yuksaltirish yo‘lidagi ezgu sa’y-harakatlari jonajon O‘zbekistonimizda yashayotgan barcha millatlarning hayoti, faoliyatida, orzu-umidlarida o‘zining yaqqol ifodasini topmoqda. Shu tabarruk yurtning fuqarosi uchun bundan ortiq saodat bo‘lmasa kerak!