Bugun tunda yengilmas professional bokschimiz Shohjahon Ergashev (11-0, KO 11) o‘zining navbatdagi jangida amerikalik Soni Fredriksonga (18-0-0, KO12) qarshi ringga ko‘tariladi.
Nyu-York shahridagi “Turning Stone Casino Resort” arenasida tashkil etiladigan mazkur jang 12 yanvar kuni Toshkent vaqti bilan 13 yanvar soat 08:00da boshlanadi.
Jang oldidan Shohjahon Ergashev mazkur bellashuvdan nimalar kutayotgani haqida O‘zA muxbiriga xabar berdi.
– Amerikalik bokschi Soni Fredriksonga qarshi o‘tadigan jangga ko‘p vaqt mobaynida tayyorgarlik ko‘rdim. U kabi ringda harakat qiladigan bokschilar bilan sparringlarda ishtirok etdim. Men Soniga qarshi ringga ko‘tarilishga tayyorman. Umid qilamanki, xalqimiz va menga ishonch bildirgan barcha yaqinlarimni xursand qilaman. Bu jang mening faoliyatimda muhim ahamiyat kasb etadi. Avval aytganimdek professional boksning yarim yengil vazn toifasida chempionlik kamarini qo‘lga kiritmoqchiman. Fursatdan foydalanib, jamoam va Showtime’ga o‘z minnatdorchiligimni bildiraman.
Eslatib o‘tamiz, mamlakatimiz boks muxlislarining xohish va istaklarini inobatga olib jang “SPORT” telekanalida to‘g‘ridan-to‘g‘ri olib ko‘rsatiladi.