O‘zbekiston Respublikasi Ichki ishlar vazirligi Madaniyat saroyida o‘tkazilgan yig‘ilishda ichki ishlar tizimida Yoshlar ittifoqi boshlang‘ich tashkilotlari faoliyatini yo‘lga qo‘yishga doir masala ko‘rib chiqildi.
2017- yil 1-dekabr kuni Ichki ishlar vazirligi hamda O‘zbekiston yoshlar ittifoqi o‘rtasida o‘zaro hamkorlik Memorandumi imzolangan edi. Hujjatda hamkorlikda amalga oshirilishi zarur bo‘lgan qator vazifalar belgilangan.
Vazirlik va Yoshlar ittifoqi tomonidan 2018-yil O‘zbekiston Respublikasi Ichki ishlar vazirligi tizimida yoshlarga oid davlat siyosatini amalga oshirish yuzasidan chora-tadbirlar dasturi imzolangan. Dasturda belgilangan chora-tadbirlarni amalga oshirish mexanizmlari, bajarish muddatlari va mas’ullari ko‘rsatib o‘tilgan.
