Farzandingiz darslarni qanday o‘zlashtiryapti? Kimlar bilan do‘st? Maktabdan keyingi bo‘sh vaqtini qanday o‘tkazmoqda? Uning yurish-turishi, qiziqishini o‘rganib borasizmi?
Xalq ta’limi vazirligi tomonidan mamlakatimizning barcha maktablarida o‘tkazilgan o‘quv maskanlarining 2018-yilgi rejalari va galdagi vazifalariga bag‘ishlangan taqdimot yig‘ilishlarida shu kabi dolzarb masalalar keng muhokama etildi.
Poytaxtimizning Mirzo Ulug‘bek tumanidagi 64-umumta’lim maktabida bo‘lib o‘tgan taqdimotga ota-onalar bilan birga huquq-tartibot idoralari, mahalla faollari taklif etildi.
– Avval farzandlarim, endi esa nevaralarim shu maktabda o‘qimoqda, – deydi Nur mahallasi faoli T.Sobirov. – Maktab rejasiga oid taqdimotning huquq-tartibot idoralari vakillari ishtirokida o‘tkazilishi yaxshi tashabbus. Imkoniyatlarning qadriga yetmay, to‘qlikka sho‘xlik qilib, o‘zini ham, ota-onasini ham mulzam etayotgan ayrim o‘quvchilar misolida boshqalar o‘zi uchun tegishli xulosa chiqarishi, ta’lim-tarbiyaga mas’uliyat bilan yondashishi uchun bunday tadbirlar yaxshi imkoniyatdir. Negaki, ta’lim-tarbiyada befarqlik, xotirjamlik ketmaydi.
Tadbirda maktabning kelgusidagi rejalari, ta’lim maskani, mahalla, ota-onalar o‘rtasidagi hamkorlikni yanada mustahkamlash xususida batafsil so‘z yuritildi. O‘qishda, jamoat ishlarida tengdoshlariga o‘rnak bo‘layotgan o‘quvchilarning ota-onalariga tashakkurnomalar topshirildi.
