Osiyo futbol konfederatsiyasi (OFK) Ijroiya qo‘mitasining Malayziyaning Kuala-Lumpur shahrida bo‘lib o‘tgan yig‘ilishida 2027–2029-yillarda turli yosh toifalaridagi Osiyo kubogi musobaqalariga mezbonlik qiladigan davlatlar tasdiqlandi.
Qabul qilingan qarorga muvofiq, 2027-yilda futbol bo‘yicha 17 yoshgacha bo‘lgan terma jamoalar o‘rtasidagi Osiyo kubogi O‘zbekistonda bo‘lib o‘tadi. Musobaqa 2027-yil 12–29-may kunlari o‘tkazilishi rejalashtirilgan.
OFK ma’lumotiga ko‘ra, turnirni o‘tkazish huquqi yoshlar musobaqalari taqvimi va mezbon mamlakatlarni qayta taqsimlash doirasida O‘zbekiston futbol assotsiatsiyasiga berilgan.
Shuningdek, OFK Ijroiya qo‘mitasi 2028-yilgi U-23 Osiyo kubogiga Yaponiyani mezbon etib belgiladi. Mazkur musobaqa 2028-yilda Los-Anjelesda bo‘lib o‘tadigan yozgi Olimpiya o‘yinlariga Osiyo mintaqasi uchun saralash turniri hisoblanadi. 2029-yilgi U-17 Osiyo kubogi esa Saudiya Arabistonida o‘tkaziladi.
Ma’lumot uchun, O‘zbekiston U-17 futbol terma jamoasi 2025-yilda Osiyo chempioniga aylangan va mamlakat tarixida ikkinchi bor ushbu nufuzli musobaqa g‘olibi bo‘lgan.
O‘zbekiston futbol assotsiatsiyasi
